Трговската војна продолжува: Кина воведува уште една контрамерка против САД
Кина денеска соопшти дека „умерено“ ќе го намали бројот на американски филмови официјално прикажани на нејзина територија, што е една од контрамерките во трговската војна со САД.
За разлика од помирувачкиот тон кон остатокот од светот, американскиот претседател Доналд Трамп во средата ги заостри царините за канадски стоки. Откако рече дека ќе му даде на остатокот од светот 90-дневна пауза за некои од неговите нови царини, Трамп ги зголеми тарифите за увоз од Кина на огромни 125 проценти.
Кинескиот министер за трговија вети дека Кина „ќе се бори до крај“ доколку Вашингтон продолжи со својата непријателска кампања за зголемување на царините и давачките.
„Лошите практики на американската влада кои вклучуваат навредливи тарифи против Кина може само да ја намалат популарноста на американските филмови кај кинеската публика“, рече портпаролот на Националното биро за филмска уметност (CFA).
„Ќе ги следиме пазарните правила, ќе го почитуваме изборот на публиката и умерено ќе го намалиме бројот на американски филмови увезени во Кина“, се вели во соопштението на CFA објавено на нејзината веб-страница. Причината за оваа најава се царините од 125 отсто на САД за кинески стоки, што тие го опишуваат како „погрешен потег“.
Кина годишно увезува 34 странски филмови за национална дистрибуција, од кои десет американски, според претходно договорениот систем на квоти. Иако американските филмови веќе не се толку популарни во Кина – вториот по големина филмски пазар во светот – тие сè уште заработуваат значителни суми таму, со заработка од 585 милиони долари во 2024 година, или 3,5 отсто од кинескиот пазар, кој заработи 17,7 милијарди долари на боксофисот. Во 2024 година, најголемиот американски успех во Кина беше спектаклот „Godzilla x Kong: The New Empire“, кој заработи 132 милиони долари.
Иако увозот на американски филмови во Кина е ограничен, Кинезите имаат лесен пристап до странски филмови преку различни платформи за стриминг и пиратски сајтови.
