ТРГОВЦИТЕ СО ХРАНА И ПИЈАЛОЦИ ЈА НАУЧИЈА ЛЕКЦИЈАТА – власта не отстапува од замрзнатите цени, можно е продолжување и по Нова Година – ИНФЛАЦИЈАТА ДОЈДЕ ДО 3,1 ОТСТО

Инфлацијата забавува, така барем покажува статистиката, која говори за сголемени трошоци на живот за 3,1 отсто. 

Но, тоа не значат и пониски цени за граѓаните, бидејќи можеби многумина забораваат дека лани во ноември стапката на инфлација изнесуваше драматични 19,5 отсто. Тоа значи дека од лани имаме многу висока споредбена основа, бидејќи цените и тогаш веќе биле драматично пораснати, така што сега не би можело да се очекува толку висок скок. 

Инаку, во октомври стапката на инфлација изнесувала 3,5 отсто, а во септември 6,6 проценти.

Најголем пад на цените има кај храната, односно маслата и мастите, кои поевтиниле за 24 отсто во споредба со истиот период лани, а по пониски цени се продаваат и млекото, сирењето, јајцата и лебот.

Додека, пак, регистрирано е зголемување на цените кај овошјето, за над 13 отсто, зеленчукот за пет проценти, а и кај алкохолните пијалоци и тутунот, кои за една година поскапеле над 10 проценти. 

Бројките за пад на инфлцијата, според власта се должат на замрзнатите цени. Затоа не се исклучува мерката да трае и по Нова година.

– Во случај одредена мерка да се злоупотреби не само што ќе ја продолжиме, туку и ќе ги зајакнеме инспекциските капацитети. Генерално прехранбената индустрија посебно трговијата на мало со храна и пијалаци веќе ја знаат лекцијата дека од страна на Министерството за економија нема да бидат дозволени злоупотреби, рече министерот за економија Крешник Бектеши.