Трет ден протест на Пластичарска поради исклучување на струјата
На булеварот „Никола Карев“, познат како Пластичарска, денеска продолжува протестот на граѓани кои веќе трет ден по ред го блокираат сообраќајот поради исклучување на електричната енергија. Протестот започна точно во 15 часот, како што беше најавено, а на терен денеска се забележува значително помал број граѓани во споредба со претходните денови.
Проблемот започна пред неколку дена, кога дел од граѓаните од населбите Серава и Дуќанџик останаа без струја, иако редовно ги плаќаат сметките. Зимските студени денови го дополнително го нагласуваат нивното незадоволство, бидејќи животот без електрична енергија е многу потежок.
Двајца учесници на протестот за нашата камера истакнаа дека не сакаат да бидат мешани со несовесните граѓани кои не плаќаат сметки, но дека нема да се откажат од протестот и ќе продолжат додека не се најде решение. Тие додадоа дека денеска биле повикани на средба кај градоначалникот на општина Чаир, со надеж дека по одржувањето на состанокот ќе следат позитивни вести.
Присутни се и припадници на МВР, кои се тука за обезбедување на редот и регулација на сообраќајот пред почетокот на протестот. Протестот ќе трае до 18 часот, како и во претходните денови. Граѓаните кои немаат потреба да минуваат низ овој дел од Скопје, се советуваат да го избегнуваат булеварот „Никола Карев“.
