Трендафилов: Голем дел од пратениците дошле на работа уште рано утринава, само за да не се соочат со работниците, се срамат!
Претседателот на ССМ, Слободан Трендафилов упати остри критики до пратениците за време на денешната блокада пред Собранието, обвинувајќи ги за лицемерие и игнорирање на работничките потреби.
„Добро утро на сите, освен на пратениците. Зошто освен на нив? Затоа што веќе две години го блокираат предлогот на Сојузот на синдикатите на Македонија за зголемување на работничките плати, за покачување на минималната плата и на сите останати плати за најмалку 600 евра во денарска противвредност“, вели тој.
Како што додаде, по 21 човек на две локации ги блокираат пристапите за да не можат да дојдат на работа со сопствени возила.
„Целта е да не можат да наплатат патни трошоци како да трошат керозин, туку да мораат да дојдат пешки или со јавен градски превоз, исто како што на своите работни места одат работниците. Моите информации се дека голем дел од пратениците дошле на работа уште рано утринава, пред 9 часот, само за да не се соочат со работниците на улица. Се кријат затоа што се срамат од своите гласачи и затоа што одбиваат да ја зголемат работничката плата“, вели Трендафилов.
Како што вели, од друга страна, пратеничките плати, според последните најави, ќе се зголемат не само за 9,2% туку и за дополнителни 12,6% поради порастот на просечната плата.
„Постои голема веројатност Уставниот суд да ја укине претходната одлука на Владата, што би значело дека на нивните високи примања од 100 или 120 илјади денари, ќе добијат уште 21% зголемување. Да биде срамот поголем, тие се подготвени да ги намалат своите коефициенти за само 9% за да глумат штедење, а сето тоа само за да не ги зголемат платите на работниците. Пратениците сакаат нивните гласачи да тонат во сиромаштија. Тоа е срамно и нечовечки. Тука сме денеска за да им покажеме дека е недозволиво жестоко да си ги бранат сопствените плати и патни трошоци, а да го игнорираат правото на достоинствен живот на работникот. Оваа блокада ќе трае сè до почетокот на собраниската седница во 11 часот.“, порача Трендафилов
