Трендафилов: Ако не се зголемат платите, следува генерален штрајк
Претседателот на ССМ, Слободан Трендафилов, денеска одржа протест пред Стопанската комора, истакнувајќи дека понудата за зголемување на платите сè уште е на маса, но дека следниот пат нема да дојдат со понуда, туку со генерален штрајк кој ќе чини многу повеќе од работничките плати.
„Добар ден на сите освен на газдите и на следачите. 21 човек сме затоа што не следат, затоа што ги заокружуваат луѓето и затоа што им се закануваат на луѓето да не дојдат на протестите. Одлучивме дека и во вторник Владата на две места 21 човек ќе ја блокираат. Тука сме кај газдите кај истите оние кои ги избркаа цели наши семејства во странство. Кај газдите кои одбиваат да ја зголемат минималната плата и кои одбиваат да ги зголемат останатите плати само затоаш то законот не се промени. Кај газдите кои се слепи послушници на владата, а владата веќе кажа дека си се договарала со своите вработени, па ги остави газдите да бидат виновни за идниот генерален штрајк и во јавниот и во приватниот сектор. Владата не им е пријател затоа што ги казнува, институциите ги даночат, им праќаат контроли и како што им кажуваат тие се договараат со своите вработени, а ги оставаат газдите да се договорат со своите вработени. Проблем е што газдите кои се тука позади нас, не дозволуваат синдикално организирање во најголемиот дел на приватниот сектор. Ќе упатам порака и до работниците, само еден на 10 ваши колеги се бори за вашите плати, можете да замислите што ќе беше ако се боревме осум од 10 вработени“, рече Трендафилов.
Трендафилов потенцира дека и покрај притисоците нема да се откажат.
„Денеска сум информиран, дека било кажано дека сега сум господин, дека сега веќе не сум бил политички определен, но дека било кажано уште пострашно, дека сега ќе ги заокружувале луѓето кои доаѓале на протестите и бараат корка леб. Дека сега ќе ги објавувале како што го објавуваа моето семејство. Никој на никого не му должи ништо во оваа држава и никој на никого не смее да му се плаши“, додаде Трендафилов.
Тој ги повика работодавачите да се договорат и да ги зголемат платите за најмалку 6000 денари.
„Да ја задолжиме државата од едниот џеб во другиот џеб да ги плаќа придонесите на тие вработени кои ќе добијат за најмалку 6000 денари зголемени плати. Понудата е уште на маса, следниот пат нема да доаѓаме со понуда, следниот пат ќе дојдеме со генерален штрајк кој ќе ги чини нив многу повеќе од нашите работнички плати. Само еден ден затварање на компанииите, институциите и државата, државата ќе ја чини многу повеќе од цело годишно зголемување на работничките плати“, нагласи Трендафилов.
