Трамп: Запомнете што реков, ова може да ескалира во Трета светска војна!
Денес се навршуваат точно три години откако рускиот претседател Владимир Путин нареди целосна инвазија на Украина.
Францускиот претседател Емануел Макрон разговараше со американскиот претседател Доналд Трамп за изгледите за ставање крај на војната во Украина. Макрон е првиот европски лидер што го посети Трамп, кој се врати на власт пред еден месец.
Во текот на утрото заедно со Трамп учествуваше на видеоконференција за Украина со другите лидери на Г7 во Белата куќа. На пат од Белата куќа до гостинската резиденција Блер, францускиот претседател рече дека пречекот на Трамп бил „многу добар, многу пријателски“. „Имавме видеоконференција во Овалната соба со Г7“, рече тој.
Двајцата лидери остварија билатерални разговори, а потоа излегоа пред новинарите на заедничка прес-конференција.
Трамп: Не сакаме ова да ескалира во Трета светска војна
„Мислам дека војната во Украина може да заврши наскоро, во рок од неколку недели, ако бидеме паметни“, им рече Трамп на новинарите во Овалната соба. „Ако не сме паметни, тоа ќе продолжи … не го сакаме тоа“, вели тој, додавајќи: „Запомнете што реков, ова може да ескалира во Трета светска војна, ние не го сакаме ниту тоа“.
Трамп неодамна разговараше со рускиот претседател Владимир Путин за време на кој лидерите се согласија да започнат преговори за ставање крај на војната во Украина.
Трамп беше прашан од новинарите дали ќе го окарактеризира Путин како „диктатор“, со оглед на тоа што тој претходно го користеше тој збор за украинскиот претседател Володимир Зеленски. „Не го користам тој збор лесно, ќе видиме како сè ќе се одвива“, рече Трамп, додавајќи дека постои „шанса за многу добар договор“ меѓу Украина и Русија. Нерешената војна меѓу двете земји „може да доведе до Трета светска војна“, додаде тој.
Трамп: Враќањето на украинските окупирани територии не е лесна работа
Во еден момент, Трамп беше прашан дали верува дека Украина ќе мора да се откаже од територијата како дел од какви било мировни преговори. „Ќе видиме“, им рече тој на новинарите. „Ова се преговори кои штотуку почнуваат“, додаде тој. Враќањето на украинската земја окупирана од Русија, додаде тој, „не е лесна работа“.
