Трамп воведува нови царини за стоки од некои земји – меѓу нив и Македонија
Македонија се најде на листата на земји на кои САД ќе им воведат дополнителни ad valorem царини, според новата извршна уредба што синоќа ја потпиша американскиот претседател Доналд Трамп. Царинската стапка за македонскиот извоз во САД ќе изнесува 15 отсто, откако земјата не постигнала целосен договор со Вашингтон за усогласување на трговските и безбедносните политики.
Новата одлука доаѓа како дел од поширока стратегија на администрацијата на Трамп за справување со, како што се наведува, „нефер трговски практики“ на одредени партнери. Извршната уредба се повикува на претходно прогласеното „трговско вонредно состојание“ и предвидува диференцирани царински стапки за земјите што се во преговори или веќе постигнале делумни договори со САД.
„Некои партнери покажаа подготвеност да се усогласат со американските економски и безбедносни интереси. Други сè уште не се целосно усогласени, па затоа се воведуваат привремени дополнителни давачки“, се наведува во документот објавен на веб-страницата на Белата куќа.
Покрај Македонија, на листата се најдоа и Србија со високи царини од 35 отсто, како и Босна и Херцеговина со 30 отсто. Царините ќе стапат на сила во рок од седум дена.
Оваа мерка може да има сериозни импликации врз македонските извозници, особено во делот на текстилната, металната и прехранбената индустрија, кои досега имаа солидна пазарна позиција во САД. Аналитичарите предупредуваат дека овие дополнителни трошоци би можеле да ја намалат конкурентноста на македонските производи и да ги пренасочат трговските текови кон други пазари.
Според уредбата, кога една земја ќе постигне договор со САД, ќе се издаде нова одлука со која ќе се дефинираат условите за укинување на царините. Досега, само осум држави или економски блокови, меѓу кои Велика Британија, Јапонија и Европската унија, успеале да ги формализираат таквите договори.
Ситуацијата го става регионот на Западен Балкан во комплицирана економска позиција, бидејќи сите земји се соочуваат со значителни царински бариери, во време кога се обидуваат да го зајакнат извозот и економската стабилност.
