Трамп: Со Кина е договорен целосен ресет!
Американскиот претседател Доналд Трамп го поздрави „големиот напредок“ постигнат за време на трговските разговори меѓу американските и кинеските лидери во Женева за царините и рече дека е преговарано за „враќање на основната линија“.
„Денеска имавме многу добар состанок со Кина во Швајцарија. Многу се разговараше, многу беше договорено“, напиша Трамп на социјалната мрежа „Truth Social“.
„Преговорите за целосно „ресетирање“ беа постигнати на пријателски и конструктивен начин. Се надеваме, во корист и на Кина и на САД, дека Кина ќе се отвори за американските компании. Постигнат е огромен напредок!“ напиша тој.
Преговорите меѓу Кина и САД, кои почнаа вчераутро во луксузна вила во Женева за да се обидат да се реши трговската војна меѓу двете земји, беа прекинати во вечерните часови и треба да продолжат утрово.
Двете престолнини испратија високи претставници во Женева овој викенд на преговори: американскиот министер за финансии Скот Бесент, американскиот трговски претставник Џејмисон Грир и кинескиот вицепремиер Хе Лифенг.
Бесент и Грир се состанаа со кинеските претставници по неколкунеделните зголемени тензии поради зголемувањето на царините на кинеските стоки за повеќе од 100 отсто од американскиот претседател Доналд Трамп. Трговскиот спор, заедно со одлуката на Трамп минатиот месец да воведе царини за десетици други земји, ги наруши синџирите на снабдување, ги потресе финансиските пазари и ги зголеми стравувањата од нагло економско забавување, пишува Индекс.
