Трамп најави укинување на санкциите врз Сирија
Американскиот претседател Доналд Трамп денес во Ријад објави дека ги укинува санкциите врз Сирија, еден ден пред закажаната кратка средба со сирискиот претседател Ахмад ал-Шарија во Саудиска Арабија.
„Ќе наредам укинување на санкциите врз Сирија за да им се даде шанса за мир“, рече американскиот претседател, додавајќи дека одлучил да го стори тоа на инсистирање на неговиот домаќин, саудискиот престолонаследник Мохамед бин Салман, и турскиот претседател Реџеп Таип Ердоган.
Трамп утре треба да се сретне со сирискиот претседател Ахмед ал-Шарех, поранешен бунтовник и член на екстремистичката група која го предводеше соборувањето на поранешниот сириски лидер Башар ал-Асад минатата година.
„Таму има нова влада која се надеваме дека ќе успее“, рече Трамп за Сирија, додавајќи: „Велам, среќно, Сирија. Покажете ни нешто посебно“.
САД размислуваат како да се справат со Ал-Шарех откако тој ја презеде власта во декември. Лидерите на Заливот ја поддржаа новата влада во Дамаск и сакаат Трамп да го стори истото, верувајќи дека тоа создава бедем против враќањето на иранското влијание во Сирија. Иран помогна во поддршката на владата на Асад за време на децениската граѓанска војна.
Претходникот на Трамп, Џо Бајден, одлуката за признавање на новата сириска влада му ја препушти на Трамп. Санкциите наметнати врз Дамаск под водство на Асад се сè уште на сила.
Пред изјавата на Трамп, Белата куќа објави дека Трамп накратко ќе го поздрави сирискиот претседател утре во Саудиска Арабија.
