ТРАМП ГИ РУШИ ЦАРИНИТЕ: Нов трговски сојуз со Велика Британија – кој губи, кој добива?
Американскиот претседател Доналд Трамп денес во Белата куќа ќе објави трговски договор со Велика Британија, според водечките глобални медиуми како што се „Њујорк тајмс“, „Би-би-си“, „си-ен-ен“ и „ројтерс“. Се очекува договорот да вклучува намалување или укинување на царините за британски челик, алуминиум и автомобили, додека Велика Британија би можела да го поништи дигиталниот данок што ги погодува американските технолошки компании.
Синоќа, Трамп најави „голема прес-конференција“ на социјалните мрежи и истакна дека ова е „првиот од многуте“ слични договори. Според извори блиски до преговорите, договорот доаѓа откако Трамп минатиот месец воведе царини од 10 проценти за повеќето трговски партнери, вклучувајќи го и Обединетото Кралство, додека царините за челик, алуминиум и автомобили достигнаа и до 25 проценти.
Британскиот премиер Кир Стармер го смета договорот за клучен економски чекор напред, особено по неодамнешниот трговски договор со Индија. Вредноста на британската фунта порасна откако протече веста за можен договор.
Иако деталите сè уште не се потврдени, аналитичарите велат дека договорот би можел да донесе краткорочно олеснување во трговските односи и да означи почеток на пошироко ублажување на трговските тензии што ја карактеризираа политиката на Трамп во последните месеци.
„Ова е прв ваков договор откако претседателот Трамп воведе сеопфатни царини. Инвеститорите со нетрпение очекуваат знаци за можно ублажување на трговскиот конфликт“, пишува Ал Џезира, повикувајќи се на извори во американската администрација.
