ТРАДИЦИЈАТА СЀ ПОСКАПА: Цената на пиперките за ајвар до 60 денари, граѓаните годинава ќе прават помалку зимница
Сезоната за подготовка на ајвар годинава започна со повисоки цени кои удираат по џебот на граѓаните, поради што многу семејства ќе бидат принудени да направат помали количини од омилената зимница. На тетовскиот пазар, цената на црвената пиперка се движи од 50 до 60 денари за килограм, сума која купувачите ја сметаат за висока во однос на нивните примања.
Според пресметките, за да се подготват просечно околу 30 тегли ајвар, едно семејство треба да издвои најмалку 4.500 денари. Во оваа сума влегуваат околу 50 килограми пиперки (3.000 денари), модар патлиџан, масло за јадење, како и трошоците за дрва или електрична енергија.
„Цените се катастрофа, ќе направат малку ајвар, ама многу малку“, вели еден граѓанин, додека друг додава: „Ќе правиме, ама се малку скапи, 50 или 60 денари пиперките се скапи, тоа зависи и од платите“.
Од друга страна, и трговците се соочуваат со проблеми. Иако тие сметаат дека цената е поволна, се жалат на драстично намалена продажба во споредба со минатите години.
„Оваа година е многу слабо, луѓето заминаа во печалба, не се веќе тука, иако цените се поволни… ама нема голем интерес“, вели еден од продавачите.
Друг продавач ја лоцира причината во ниската куповна моќ на населението: „Немаат пари, им изгледа скапа пиперката, доматот… со една пензија што ќе направиш, пензијата мала и затоа многу слабо се продава“.
