Тошковски: Тест-периодот на „Сејф Сити“ донесе помалку повредени во сообраќајни несреќи

Министерот за внатрешни работи Панче Тошковски од собраниската говорница порача дека е неопходно да започне имплементацијата на проектот „Безбеден град“, нагласувајќи дека целта е спасување човечки животи и дека сите евентуални проблеми ќе се решаваат во текот на примената.

Тошковски одговараше на пратеничко прашање од Илир Хасани од Европскиот фронт, кој како лекар-трауматолог ја поддржа имплементацијата на проектот, укажувајќи и на одредени забелешки кои ги изнеле граѓаните за време на тест-периодот.

Министерот се согласи дека проектот започнува со задоцнување, истакнувајќи дека многу земји членки на Европската Унија вакви системи имплементирале уште пред една и пол деценија, додека Македонија доцни најмалку десет години.

Тој посочи дека за време на тест-периодот од 15 до 16 дена, според информации од здравствените служби, е забележано намалување на бројот на лица со тешки телесни повреди во сообраќајни несреќи.

Тошковски нагласи дека просекот на загинати во сообраќајот во земјава во последните 15 години изнесува 145 лица годишно, што, како што рече, ја става Македонија меѓу најлошите во Европа. За споредба, тој наведе дека во Хрватска годишно гинат околу 65 лица на милион жители, во Словенија околу 55, во Германија и Австрија 40 до 45, додека во скандинавските земји бројката е околу 20, наспроти околу 80 загинати на милион жители кај нас.

– Ова не е прашање на политика, ниту на етничка или професионална припадност. Станува збор за спасување човечки животи и очекувам поддршка од сите пратеници, без разлика дали се од власта или од опозицијата – истакна Тошковски.

Тој додаде дека Собранието треба да ги донесе законските решенија неопходни за целосна имплементација на проектот, нагласувајќи дека можни се пропусти, но дека системот мора да започне со примена.

Од своја страна, пратеникот Илир Хасани посочи дека за време на тест-периодот биле забележани одредени слабости, како што се изрекување опомени или казни за минимално пречекорување на брзината, недостиг на мобилни телефони или електронска пошта кај дел од граѓаните за достава на известувања, како и ограничената примена на системот во неколку градови. Сепак, тој ја повтори поддршката за имплементација на проектот „Безбеден град“, истакнувајќи ја неговата важност од аспект на јавното здравје и безбедноста во сообраќајот.