Тошковски: Македонија денес е побезбедна од пред две години – фактите говорат
Министерот за внатрешни работи Панче Тошковски изјави дека Македонија денес е далеку побезбедна отколку пред две години, повикувајќи се на податоци, факти и реалната состојба што, според него, ја потврдуваат и самите граѓани. Во одговор на критиките од опозицијата, Тошковски рече дека е разбирливо опозицијата да обвинува, бидејќи тоа ѝ е задача, но порача дека добро би било тие обвинувања да бидат аргументирани и засновани на реални споредби.
„Добро би било да има додаена вредност на тоа што го прави опозицијата, да не е само паушално и да не е само празни обвинувања за да бидат присутни во етерот. Но, тоа е нивна работа и нека си оценат како ќе продолжат понатаму“, изјави Тошковски по потпишувањето на меморандум за соработка со Црвениот крст.
Во врска со последното убиство во Батинци – второ за една година во истото село – министерот информираше дека истрагата е во тек и оти МВР работи на лоцирање на сторителот.
„Случајот е расветлен од аспект на сторител и преземени се конкретни дејствија. Постапуваме во насока на идентификување на локацијата на сторителот. Не би сакал да навлегувам во детали, но кога ќе имаме нови информации, јавноста ќе биде известена“, рече Тошковски.
