„Тој што ќе признае нема пола да му се прости, но ќе биде ценет исклучително“, рече судијката но никој од 37. обвинети во Адитив не чувствува вина за криминалот од 6,5 милиони евра
Никој од 37-те обвинети за злоупотреби во државната компанија ЕСМ, кои според обвинението го оштетиле буџетот за најмалку 6,5 милиони евра, не се чувствува виновен. Судењето почна вчера во новата дигитална судница во близина на затворот Идризово, која со години стоеше неискористена, иако беше изградена со средства од Европската Унија.
Пред обвинетите да се изјаснат, судијката Даниела Димовска испрати порака дека признанието на вина ќе се смета како особено олеснителна околност.
„Тоа не значи дека половина од казната ќе биде простена, но судот ќе го земе предвид признанието. Ќе се води сметка и за возраста и за начинот на вклучување на дел од обвинетите во шемата“, рече судијката.
Според обвинителката Наташа Поп Трајков, обвинетите организирано местеле тендери за набавка на адитиви за јаглен за потребите на РЕК Битола и РЕК Осломеј, преку пререгистрации на фирми и однапред договорени економски оператори.
„Ќе докажеме институционална и морална распаднатост во ЕСМ. Пред нас стои злосторничко здружување на кои државата им ја доверила енергетската безбедност, а тие ја искористиле функцијата за личен профит“, изјави Поп Трајков.
Обвинети се 31 физичко и 5 правни лица. Меѓу нив се поранешните директори на ЕСМ – Васко Ковачевски, кој е во бегство, и Васко Стефанов, кој се наоѓа во притвор. Обвинителството побара Ковачевски да му се суди во отсуство.
Меѓу останатите обвинети се и лица поврзани со приватни фирми и цели семејства – Јорданови, Стојановски, Алексовски и други. Обвинети правни субјекти се „Хем Алијанс ДООЕЛ Неготино“, „Дади Трејд ДООЕЛ Велес“, „Контракси компани“ и стоматолошка ординација од Велес.
Судењето ќе биде едно од најобемните процеси за економски криминал во земјава, и ќе се води со помош на новата дигитална опрема обезбедена преку ЕУ-проекти.
