„Тивок повик“ преку QR кодови: Како радикалите регрутираат млади во Македонија додека МВР брои рекорден раст на кривични дела

Додека државата на хартија подготвува нов закон за следење на онлајн просторот, на терен се одвива „тивок лов“ на млади умови. Суптилни форми на регрутација, скриени зад безопасни QR кодови и групи за „поддршка“ на Телеграм, стануваат главното оружје на радикалните структури во земјава. Безбедносните служби веќе пресретнале конкретни планови за терористички акти инспирирани од ИСИС, токму во периодот 2024-2025 година.

На прв поглед делуваат мотивирачки, духовни и безопасни. Но, истражувањата, вклучително и анализите на ISSAT, потврдуваат дека зад оваа фасада се крие добро организирана мрежа, објaви Сител.

Податоците на МВР ја потврдуваат сериозноста на состојбата. 2024 година ќе остане запишана како година со рекорден број на регистрирани кривични дела поврзани со омраза и радикализам – вкупно 25, што е двојно повеќе во споредба со претходните години.

Статистика на МВР за дела од омраза и радикализам:

Најголем пораст има кај делото „предизвикување омраза и раздор“, кое од само 2 случаи годишно, скокнало на 9 во 2024 година.

Павле Трајанов, претседател на Националниот комитет за спречување насилен екстремизам, открива застрашувачки податок – онлајн радикализацијата веќе се прелеала во реалниот свет.

Тој најавува дека државата подготвува нов закон кој ќе овозможи следење на онлајн радикализацијата дури и во затворени платформи, како што се „четовите“ во видео игрите, каде што младите се најранливи.

Професорот по безбедносни науки, Методи Хаџи-Јанев, предупредува дека системот доцни. Според него, главниот предизвик е што технологиите направени за комфор, сега се користат како „вектор на закана“.

Истражувањето „Разбирање на превенцијата на радикализацијата во Северна Македонија“ мапира уште една критична точка – верските објекти. Алармот е вклучен за Куманово, каде се тврди дека Исламската верска заедница (ИВЗ) нема целосна контрола врз џамиите, што го прави градот „плодна почва“ за регрутирање. До моментот на објавување, ИВЗ не одговори на прашањата за контролата врз објектите и растот на радикалните групи.

За разлика од нив, од МПЦ-ОА излегоа со јасен став дека не препознаваат раст на екстремизам во своите редови.

Надлежните апелираат до граѓаните да не молчат. Како клучна алатка за превенција се посочува „Red Button“ (Црвено копче) на веб-страницата на МВР, каде може анонимно да се пријави секој сомнителен обид за радикализација, пред „тивкиот повик“ да се претвори во насилство.

Извор: Сител