Тинејџерка убиена од ајкула во Австралија: Ја нападна на популарно место за сурфање, иако има заштитни мерки
Тинејџерка починала откако била нападната од ајкула во Квинсленд, Австралија. Болничарите одговориле на повикот за „сериозен инцидент со каснување од ајкула“ на плажата Вурим, северно од Бризбејн, околу 16.45 часот во понеделникот, напишаа службите за итни случаи на IX.
Полицијата потврди дека тинејџерката се здобила со повреди опасни по живот и починала нешто по 17 часот. Австралиските медиуми јавуваат дека таа имала 17 години.
Водите околу плажата се дом на многу ајкули, но нападот се случи блиску до брегот на популарно место за сурфање кое има мерки за заштита од ајкули.
Полицијата потврди дека девојчето пливало во водите на островот Бриби – недалеку од копното, каде што се наоѓа плажата Вурим – кога била нападната од ајкула, чиј вид не е идентификуван.
Службата за брза помош во Квинсленд потврди дека жртвата претрпела повреди на горниот дел од телото опасни по живот.
Австралиските медиуми јавуваат дека ајкулата ја каснала за рака на околу 100 метри од брегот, пренесува BBC.
Кристофер Потер пристигна на плажата веднаш по нападот.
„Има многу пливачки групи кои пливаат овде, наутро и попладне. Познато е дека има многу ајкули околу Бриби, но блиску до брегот, сè уште е шок“, рече тој.
Водите во близина на плажата се заштитени со тапани – буриња закотвени на морското дно кои имаат куки за мамка за да фатат ајкули кои се приближуваат премногу.
Целните видови фатени во нив потоа се евтанизираат, додека другите видови се преместуваат и се ослободуваат.
