Тинејџер од САД отишол да ги земе браќата од погрешна куќа, а сопственикот го застрелал – сега е можен доживотен затвор!
16-годишниот Ралф Јарл бил застрелан во главата откако се појавил во погрешна куќа за да ги земе своите помали браќа близнаци. Пукањето се случило во четвртокот околу 22 часот по локално време во Канзас Сити, а 16-годишникот моментално е во болница. Полицијата потврди дека црн тинејџер влегол во погрешна куќа и таму бил застрелан.
Тетката на Ралф, Фејт Спунмор, рече дека тинејџерот избегал, но морал да тропне на вратите на три различни куќи пред некој да му помогне. Полицијата истакна дека Ралф има повреди опасни по живот. Сопственикот на куќата кој наводно го застрелал Ралф бил приведен во четвртокот, но ослободен во очекување на понатамошна истрага, пишува Sky News.
Спунмор додаде дека Јарл отишол во погрешна куќа, еден блок подалеку од куќата што ја барал. „Застана на патеката и заѕвони на вратата. Човекот од куќата ја отвори вратата, го погледна мојот внук во очи и го застрела во глава. Мојот внук падна на земја и мажот повторно го застрела“, опиша таа.
Полицијата не ја објави расата на наводниот напаѓач
Адвокатот за граѓански права Бен Крамп изјави за локалните медиуми дека семејството на Ралф изјавило дека напаѓачот бил бел. „Неизбежно е да не се признае расната динамика што е во игра“, додаде Крамп, кој го претставува семејството на Ралф. Официјалните лица не го именуваа наводниот напаѓач ниту ја потврдија неговата раса. Тие, исто така, не потврдија колку пати била застрелана жртвата или какви повреди се здобила.
Законот во Мисури дозволува лице да биде притворено до 24 часа за да истражи кривично дело. Во тој момент, лицето мора да биде ослободено или уапсено и формално обвинето. За да уапсат некого, на полицијата и треба официјална изјава од жртвата, форензички докази и други информации за комплетирање на списите на случајот. Полицијата се уште не може да го земе исказот на жртвата.
„Сакам сите да знаат дека слушам и ја разбирам загриженоста на заедницата“, рече началникот на полицијата во Канзас Сити, Стејси Грејвс. Пукањето предизвика протест, а стотици луѓе вчера се собраа пред домот каде што, наводно, бил застрелан Ралф. Страницата GoFundMe која собира пари за неговите медицински трошоци, собра повеќе од 700.000 долари.
Белецот (84) кој застрела црнец (16) на прагот од неговата куќа се соочува со доживотен затвор
Обвинителството обвини 84-годишен белец од Канзас Сити за две кривични дела во понеделникот затоа што пукал во црн тинејџер кој ги земал своите помлади браќа и отишол во погрешна куќа. Ендрју Лестер е обвинет за напад што може да донесе доживотна затворска казна за пукањето во Ралф Јарл (16) на прагот од неговиот дом околу 22 часот минатиот четврток, рече обвинителот.
„Можам да ви кажам дека имаше расна компонента во случајот“, рече окружниот обвинител на округот Клеј, Захари Томпсон на прес-конференција, но извештаите на медиумите велат дека обвинението не вклучува кривично дело од омраза.
Лестер испука два куршуми низ стаклената врата со револвер, рече обвинителот. Јарл, кој беше застрелан во главата и раката, не го премина прагот, рече Томпсон, додавајќи дека се чини дека не биле разменети зборови во средбата.
„Ниту едно дете не треба да живее во страв дека ќе биде застрелано затоа што ѕвони на погрешна врата“.
