ТФТ по голема борба преку Работнички до полуфинална реприза на ланското куп-финале (ФОТО)

Составот скопско Тафталиџе со ова се избори за полуфиннална пресметка против МЗТ Скопје, што воедно ќе биде реприза на ланското финале во кое сензационално дојде до победничкиот пехар. Клучна за триумфот на бранителот на тронот беше серијата 16-4 остварена на стартот од последната четвртина со која негативата од четири поени беше претворена во конмфорно водство (68-60), кое се покажа доволно за посакуваниот триумф.

Ова беше потврда на добрата игра од првата четвртина, во која ТФТ имаше и плус 13 (19-6), а за која најзаслужен беше младиот Виктор Ташовски со 11 поени само во четвртиот период од играта. Центарци имаа добри моменти, особено во финишот од вториот и третиот дел од мечот, но снемаа сили во клучниот дел од натпреварот, што на крајот скапо ги чинеше.

Фантастичниот Ташовски средбата ја заврши со 16 поени, додека најефикасен во победничкиот тим беше Џермејн Бишоп со 21 поен, додека зад него беше Александар Костоски со 18 поени. Камерон Форте и Никола Малешевиќ со по 27 поени беа најпрецизни кај Работнички.

Ова значи дека во утрешните полуфинални пресметки во СРЦ „Кале“ прво силите ќе ги одмерат ТФТ и МЗТ Скопје (17 часот), а потоа Пелистер и Феникс (19.30 часот). Финалето е в сабота од 19.30 часот во кое ќе се најдат победниците од овие два меча.