ТФТ овој пат немоќен: МЗТ со дебела камата се одмазди за ланскиот финален шок (ФОТО)

Аеродромци по 16-ти пат ќе играат за победничкиот трофеј, со надеж дека во утрешниот последен меч од завршниот турнир во СРЦ „Кале“ ќе го прослават 11. триумф во ова натпреварување, со што ќе се одлепат на врвот од вечната листа победници, со еден пехар повеќе во однос на вечниот ривал Работнички.

Неизвесноста во овој меч траеше само во првите неколку минути, кога на семафорот стоеше 9-8 во корист на актуелниот победник. Потоа следуваа осум поени во низа на сино-белата чета, за до крајот на првиот период да дојде и до првото двоцифрено водство (28-18), како показател како ќе се одвиваат работите на паркетот. Со секоја следна четвртина се зголемуваше водството на „металците“, за во третиот период да дојде и до огромни плус 36, кои, сепак, беа надминати во последниот дел од средбата, кога позитивата на актуелниот шампион ја достигна и границата од плус 40 поени.

Избраниците на тренерот Драган Николиќ беа снајперски расположени, за што говорат и дури 18 постигнати тројки и тоа со со фантастичен процент (60-отсто). Ако на ова се додадат и драстично поголемиот број асистенции (28-9) и помалку загубени топки (6-20) тогаш е јасно зошто средбата заврши со толку голема разлика.

Дамјан Стојановски беше прво име кај МЗТ Скопје со 18 поени до кои дојде со пет тројки со само две промашувања, додека зад него беше резервистот Дамјан Робев со 16 поени 94/6 за три поени). Расположен за шут од далечина беше и Војдан Стојановски со четири тројки со едно промашување за вкупно 13 поени, додека за одбележување е настапот и на Дастин Вер со седум поени и дури 12 асистенции. Џермејн Бишоп со 15 поени беше најпрецизен кај ТФТ.

Противник на составот од Аеродром во утрешното финале од 19.30 часот ќе биде победникот од второто вечерашно полуфинале помеѓу Феник и Пелистер.