„Терор врз граѓаните“ – Герасимовски најавува кривични пријави за Комунална хигиена поради неисчистено ѓубре!
Градоначалникот на Општина Центар, Горан Герасимовски денеска најави дека се подготвуваат кривични пријави против Јавното комунално претпријатие „Комунална хигиена“.
Како што вели, тоа е поради недозволивата состојба со сметот во Скопје.
„Јас, како градоначалник, и мојот тим отпочнуваме со порадикални мерки. Подготвуваме кривични пријави до комуналното претпријатие по неколку члена за заштита на животната средина и дополнително бараме законски измени во тој домен“ – посочи Герасимовски.
Според него, институцијата со години не си ги извршува обврските, а граѓаните се тие што ја трпат штетата.
„Сметот претставува грда слика за самите граѓани, но и за туристите кои го посетуваат центарот на градот. Истото ги засега и другите општини. Ова е навистина крајно сериозно – недозволиво е ова во 21 век. Со години наназад правиме притисок, апелираме до Јавното комунално претпријатие редовно да го чисти сметот. Граѓаните се колатерална штета, а плаќаат за таа услуга. Преку сметката за водовод плаќаме и за управување со сметот. Недозволиво е градот, односно комуналното претпријатие, да не ги завршува своите работи навреме“ – рече Герасимовски во емисијата „Објектив“ на МРТ.
Тој вели дека Општина Центар располагало со 110 хигиеничари кои секојдневно се на терен, но и тоа не е доволно ако Градот Скопје не си ја завршува својата работа.
