ТАВ Македонија со 41% повеќе патници во првата половина од 2023

ТАВ Македонија бележи силен пораст на бројот на патници за периодот јануари – јуни 2023 година. Имено, 1.338.406 патници патувале преку Меѓународниот Аеродром Скопје и Аеродромот Св. Апостол Павле Охрид во првата половина на 2023 година, што претставува годишен пораст од 41%.

Споредено со 2019 година, која што се смета за референтна година во авијацијата, бидејќи беше најсилната година од аспект на патнички сообраќај пред да се случи кризата со ковид-19, ТАВ Македонија има 15% повеќе патници во првата половина од оваа година.

Во однос на бројот на летови за истиот период, и тука двата македонски аеродроми повторно имаат пораст од 23%, или вкупно 10.299 опслужени летови од јануари до јуни 2023 година.

„Со оглед на тоа што летната сезона е во полн ек, и со сумираните бројки за авиосообраќајот за првата половина на 2023 година, или за периодот јануари – јуни, ние како ТАВ со задоволство забележуваме силен позитивен тренд на закрепнување и зголемување на бројките на патници. Не само што продолжува позитивниот тренд од 2022 година, туку истиот е и надминат за 41 отсто, а прогнозите на *ACI дека патничкиот сообраќај на европските аеродроми годинава ќе биде помал за 9% во однос на 2019 година, кај нас се повеќе од надминати. Ние имаме 15 отсто повеќе патници од 2019 година, која што беше најсилната година за авиосообраќајот пред кризата со ковид-19. Ваквиот пораст на бројот на патници е доказ и резултат на нашата посветеност, ангажираност и ориентираност кон резултати и кон нашите клиенти и доброто управување. Драго ни е што гледаме дека порастот на авиосообраќајот продолжува и во 2023 година, а враќањето на довербата на патниците во воздушниот сообраќај, во комбинација со нашата извонредност во квалитетот на аеродромските услуги, очекуваме дека оваа година ќе биде година на достигнување нови пресвртници во бројките и статистиките за авиосообраќајот за двата македонски аеродрома.“ – изјави Неџат Курт, генерален директор на ТАВ Македонија.

Во ТАВ Македонија сметаат дека новите авиолинии и новите авиокомпании коишто влегоа на македонскиот авијациски пазар во изминатите неколку месеци, покрај редовните авиолинии што сообраќаат преку целата година и традиционалните летни сезонски и чартер-летови, претставуваат уште еден дополнителен придонес за континуирано зголемените резултати (на скопскиот аеродром: Франкфурт со Луфтханза; Сплит со Кроација ерлајнс; Осло со Норвеџиан; на охридскиот аеродром: сезонски летови од Манчестер и Лондон-Гетвик со ТУИ и Белград со Ер Србија).

Најфреквентни дестинации од Меѓународниот Аеродром Скопје според статистиката за патничкиот авиосообраќај на ТАВ Македонија, за првата половина од 2023 година, јануари – јуни, биле Истанбул (двата аеродрома ИГА и Сабиха Гокчен со 11,4% пазарен удел), Базел Милуз (6,7%), Цирих (5,9%), Дортмунд (4,9%), Виена (4,6%), потоа следат Минхен Меминген (4,3%), Франкфурт (3,5%), Малме (2,9%) и Келн (2,6%).

Топ 5 земји со директни летови за периодот јануари – јуни 2023 година беа Германија (27,9% пазарен удел); Швајцарија (14,6%); Турција (14,5%); Италија (7,4%) и Шведска (6,9%).

Во однос на учеството на авиокомпаниите во патничкиот сообраќај во првите 6 месеци од 2023 година на скопскиот аеродром, Виз ер има превезено најголем број патници во (64,6% удел на пазарот), потоа Туркиш ерлајнс (6,6%), Пегасус ерлајнс (6,5%), Аустриан ерлајнс (4,6%), Чер ерлајнс (4%).

На охридскиот аеродром, во првата половина од 2023 година, најфреквентна дестинација за патување беше Базел (23,7% удел), потоа Виена (22,6%), Дортмунд (17,9%), Меминген (11,8%), Малме (8,6%), Цирих (8,4%) ), Амстердам (6,1%), а останатите дестинации имаат 0,2% пазарен удел.

Моментално и согласно летниот ред на летање, од Меѓународниот Аеродром Скопје летаат 21 авиокомпанија до 47 дестинации, додека од Аеродромот Св. Апостол Павле Охрид, 6 авиокомпании летаат до 12 дестинации.