Таткото на Васил Јованов се изјасни дека не се чувствува виновен
Зоран Јованов, татко на Васил Јованов, денеска пред Основниот кривичен суд во Скопје изјави дека не се чувствува виновен и дека не разбира што точно му се става на товар. Тој е обвинет за „загрозување на безбедноста на сообраќајот со опасно дејствие или средства“, по трагичниот инцидент во кој неговиот син, управувајќи автомобил без дозвола и под дејство на алкохол, усмрти пешак.
Обвинителот Александар Марковски истакна дека Јованов преку родителска попустливост придонел за создавање на опасната состојба.
„Во случајот станува збор за еден ноторен факт – татковата љубов спрема синот единец била голема, но резултирала со несреќна пропустливост на родителот кон синот кој се оддал и на пороци“, рече обвинителот.
Тој додаде дека обвинителството ќе докаже дека таткото придонел за опасната состојба која ја генерирал неговиот син, обвинетиот Васил Јованов.
„Факт е дека обвинетиот претходно не се судрил со законот и е офицер за пример во македонската Армија, но не сме тука да ја цениме неговата професионалност, туку што требало или не требало да направи како родител“, нагласи Марковски.
Адвокатот Сашко Дуковски, кој го застапува Зоран Јованов, оцени дека обвинението е правно неосновано и најави дека ќе бара детално образложение за секој поднесен доказ.
„Се работи за правен преседан незабележан во македонската правна историја – да го товарите таткото за дејствија на неговиот полнолетен син“, рече Дуковски, додавајќи дека ќе бара објаснување за правната релевантност на секој доказ.
На почетокот на денешното рочиште, таткото на Фросина Кулакова, Тодор Кулаков, упати прашања кон судечкиот совет, барајќи судијката Снежана Марковска да се изземе од предметот.
„Редно е да се иземете од овој предмет, ова е наместено“, рече Кулаков, по што беше отстранет од судницата. Адвокатот Дуковски реагираше дека ќе го напушти судењето доколку Кулаков повторно му се обрати директно.
Зоран Јованов се гони за „загрозување на безбедноста на сообраќајот со опасно дејствие или средства“, по изменет обвинителен предлог на изминатото рочиште, кој првично беше „предизвикување општа опасност“.
Инцидентот се случи во јануари годинава, кога Васил Јованов управуваше автомобил без дозвола и под дејство на алкохол и удри во пешачката Фросина Кулакова, која почина на местото на настанот.
