„Татко ми работеше во М-НАВ, но јас бев „принуден“ да и поминам обуките и испитите“, вели синдикалецот Тасевски за непотизмот
Претседателот на Синдикатот на М-НАВ преку Фејсбук објава се заблагодарува на премиерот Димитар Ковачевски бидејќи како што вели тој конечно некој ги слушнал барањата на синдикатот и контролорите на летање. Тој во обраќањето се осврнува и на наводите за непотизам во М-НАВ и вработување на блиски роденини.
„Што се однесува до инсинуациите за семејни вработувања и непотизам, во конкретниов случај посочен јас и моето семејство, стојам на располагања, на сите институции, и ревизии, со соодветни документации, лиценци и обуки, завршени во странство, и кај нас. Како дел од нив, би напоменал многу-бројни обуки во ЕУРОКОНТРОЛ, центри за обука за контролори на летање во Америка, почетното школо за контрола на летање во Белград, постојани проверки на теоретско и практично знаење и способност, лиценци за инструктор и за испитувач…“, пишува Тасевски.
Тој додава дека неговото образование започнало многу пред М-НАВ дури и да постои како компанија, во далечната 1993та година.
„Фактот што татко ми, посочен исто во изјавата, бил претходно вработен во полето на авијацијата, од времето на бивша Југославија па после и во М-НАВ, но јас сепак бев “принуден” да ги поминам сите тие обуки, курсеви, испити и препреки, укажува на професионалноста од негова страна, доблеста и дисциплината што ни ја втемели во нашиот карактер“, додава Тасевски.
