Тасевски: Утре е денот Д, или директорите ќе бидат разрешени или го затвораме воздушниот простор!
За случувањата во М-НАВ се очекува владата утре да дебатира на седница.
Првиот човек на синдикатот Александар Тасевски во изјава за Дојче Веле порача дека утре е денот Д.
Како што вели тој, или директорите ќе бидат разрешени, или контролата на летање ќе го затвори воздушниот простор над Скопје.
„Се надеваме дека сето ова што се случи ќе резултира со разрешување на директорите во М-НАВ. Во спротивно покажуваат дека и во Владата не им е битно ништо освен фотелјите“, вели Тасевски за ДВ.
Доколку директорите не бидат разрешени, синдикатот вели дека нема друг избор освен да го затвори небото над Скопје од среда 10 јануари, главно поради безбедноста на патниците.
Штрајкот ќе трае се додека не се исполнат нивните барања.
Незадоволството трае подолго време и синдикатот неколку пати предупредуваше дека се вработуваат партиски и нестручни кадри, поради што е побарана сериозна реформа во службата и подобрување на условите за работа.
