Тасевски: М-НАВ е полн со манекени, а професионалците си заминуваат
Претседателот на синдикалната организација на Македонска навигација (М-Нав), Александар Тасевски, во интервју за 24инфо алармира дека во претпријатието владее хаос поради партиски вработувања, додека стручниот кадар си заминува или оди во пензија.
Според него, огласите за нови вработувања биле злоупотребени за вработување на лица блиски до политички партии, без потребните квалификации и документација.
„Во М-Нав се случува хаос, се вработува се и сешто, кадар што не ни е потребен, а при тоа е и без квалитет. На крајот излезе дека оние кои се наводно најквалитетни кандидати, се впрочем партиски кадар,“ изјави Тасевски за 24инфо.
Тој посочи дека за случајот е известена и Трудовата инспекција, која двапати извршила контрола во претпријатието, но засега нема епилог.
Синдикатот, како што најави, ќе ги почека резултатите од функционалната анализа на М-Нав што Владата ја најави, пред да се одлучи за евентуален штрајк.
Тасевски предупреди и на сериозен недостиг од стручен кадар, особено инженери и контролори на летање.
„Очигледно е дека низ годините наназад се вработуваа луѓе кои не одговараат на реалните потреби. Немаме инженери, немаме контролори, а работата ја влече мал број луѓе. Поголемиот дел се буквално манекени кои само доаѓаат на работа и не прават ништо,“ истакна претседателот на синдикатот.
Во интервјуто, Тасевски откри и дека редовно се соочува со закани и притисоци, но, како што нагласи, тоа нема да го спречи во борбата за подобри услови за работниците во М-Нав.
