Таравари ги коментираше заминувањата: Не мислеа на народот, туку на власта
На вонредното заседание на Собранието на Алијансата за Албанците, од крилото на Арбен Таравари беше разрешен досегашниот претседател на Собранието на партијата, Арбен Фетаи. Како што истакна Таравари, седницата на Собранието е иницирана од две третини од членовите и доаѓа неколку дена по противењето на неколку високи партиски функционери на неговата одлука за излегување од Владата и коалицијата. За нов претседател на Собранието на АА е избран Назим Таипи.
„Исклучивме и неколку членови на претседателството, кои веќе јавно се изразуваат против Алијансата за Албанците. Исклучени се вкупно осум од 46 членови на Централното претседателство, што значи дека продолжуваме со мнозинство, а седницата беше одржана со апсолутно мнозинство во Централното собрание. За Мимоза Муса нема донесено одлука, бидејќи не е јасно дефинирано нејзиното определување – дали останува со Алијансата или преминува во ВЛЕН – немаме јасна порака“, изјави Таравари.
„По заминувањето на тие што се интересираат само за власт, Алијансата за Албанците силно ќе се зајакне и ќе стане водечка политичка сила во иднина“, додаде тој.
Таравари информираше дека Собранието ја потврдило одлуката на партијата за излегување од Владата и самостоен настап на локалните избори во октомври. Најави и можни соработки и со ДУИ и со ВЛЕН.
„Во Битола, во Кичево, во Брвеница, во Чашка, во Преспа, во Бутел ќе соработуваме со ДУИ и со ВЛЕН, бидејќи само така можеме да им помогнеме на Албанците, тоа е во интерес на Албанците. Во другите општини ќе видиме… Нема конечна одлука. Не ја исклучуваме соработката со ниту една опозициска партија, освен со Левица. Бидете сигурни дека со Левица нема да соработуваме“, изјави Таравари.
