Таравари: Би поддржале и малцинска Влада, но подготвени сме и да раководиме со одредени институции
Претседателот на Алијанса за Албанците, Арбен Таравар, изјави во четвртокот вечерта дека за неколку дена ќе биде познато дали неговата партија ќе стане дел од Владата или не.
Оваа работа, тврди тој, не е завршена. Алијанса за Албанците би можела да поддржи и малцинска Влада, но според Таравари, партијата е подготвена и да преземе одредени одговорности и да раководи со институции.
„Мислам дека за неколку дена ние треба да одлучиме. Јас планирам идната недела да свикам Централно претседателство и да ја завршиме оваа работа“, рече Таравари за емисијата „Вин Вин“ на ТВ Телма.
Добиваме јасни пораки, вели тој, дека не е добро во 2023 година да се оди на предвремени избори, посочувајќи дека тие би поддржале и малцинска влада без да добијат министерско или директорско место и да бидат бекап на Владата, да обезбедат кворум во Собранието, а Владата да се обиде да направи 80 пратеници за уставни измени.
„И ова сме го понудиле и јавно го кажувам, меѓутоа подготвени сме да земеме и одредени одговорности и евентуално да раководиме одредени институции“, рече Таравари.
Претседателот на Алијансата тврди дека за кадровски прашања воопшто не е разговарано на средбите со премиерот Димитар Ковачевски. На последната средба, најголем дел од времето зборувале за програмското усогласување. Но, тој вели дека една од нивните цели е борбата против корупцијата и дека со раководење во одредени институции тие би го покажале тоа.
Со претседателот на Алтернатива, Таравари вели дека имаат релативно добра комуникација и дека се сретнале два пати и дека нивната намера не е некој да излезе од Владата, туку и Алијансата да даде свој придонес или од надвор или од внатре.
Таравари посочува дека периодот во кој се наоѓаме како држава е малку поинаков од оној што бил пред февруари во 2022 година. Инвазијата на Русија во Украина, според Таравари, сменила многу работи, а почетокот на процесот на скрининг на земјава, заедно со Албанија, нè доведува до ситуација во која не треба да се размислува само за рејтингот на партијата, туку и за доброто на обичниот граѓанин и на општеството.
