Така се освојуваат титули: Арсенал со гол во 97. минута до победа во Лутон (ВИДЕО)

Тоа е прв триумф на „топчиите“ против овој ривал на неговиот терен по пауза од 40 години, а до него дојде со гол во седмата минута од судиското продолжение во второто полувреме. Херој на Арсенал беше Деклан Рајс кој со висок скок го дочека глава центаршутот од Одегард и го совлада домашниот голман.

Претходно, Арсенал два пати водеше, со головите на Мартинели и Габриел Жезус, Лутон израмни преку Ошо и Адебајо, а Баркли во 57. минута првпат го донесе домашниот тим во водство, со 3-2. Хаверц израмни, а кога сите очекуваа двете екипи да освојат по еден бод, Рајс се погрижи за победа на лондонскиот тим. Со тоа го спаси и голманот Раја кој доби шанса на овој меч, но немаше своја вечер и беше директен виновник за два гола на противникот.

Ова е четврти триумф на Арсенал со гол во последните моменти од своите натпревари оваа сезона. Против Јунајтед погоди во 96. и 101. минута, против Сити во 86., а против Брентфорд во 89. минута. Дури и против Челси освои бод по негатива од 0-2 и со гол за израмнување во 84. минута.