СВЕТОТ ВЕЌЕ НЕ ФУНКЦИОНИРА ПО СТАРИТЕ ПРАВИЛА Мицкоски вели дека сигналите на Рубио се клучни за сојузниците
Премиерот Христијан Мицкоски, во рамки на повеќедневната посета на Сојузна Република Германија, учествува на 62. Минхенска безбедносна конференција, каде што се сретна и со влијателни светски лидери и дипломати.
– Морам да потенцирам дека пораките на американскиот државен секретар Марко Рубио се јасен сигнал за сите сојузници – светот веќе не функционира по старите правила, а иднината ќе ја градиме преку сериозност и взаемно почитување. САД и Европа остануваат нераскинливо поврзани, а како Влада продолжуваме посветено да го зајакнуваме нашето место во трансатлантската заедница. Подготвени сме да одговориме на предизвиците, да ја модернизираме одбраната и да обезбедиме сигурна иднина за нашите граѓани – истакна Мицкоски во објава на својот Фејсбук профил.
Во текот на конференцијата, Мицкоски ќе ја реафирмира определбата на Македонија за предвидлив и фер процес на интеграција во Европската Унија, без дополнителни билатерални условувања, соопшти владината прес-служба.
Премиерот е придружуван од министрите за одбрана, Владо Мисајловски, за надворешна политика и надворешна трговија, Тимчо Муцунски, и за внатрешни работи, Панче Тошковски.
Минхенската безбедносна конференција оваа година го стави акцентот на глобалните безбедносни предизвици, улогата на трансатлантските сојузи и потребата од модернизација на одбранбените капацитети, теми кои се во фокусот на Владата на Мицкоски.
.
