Светот се разбуди во нов царински шок: За Кина од денес стапка од 104 отсто
Новите царини што САД ги воведуваат на земјите ширум светот, вклучително и 104 отсто за Кина, стапија на сила денеска.
Покрај високите царини за Пекинг, САД воведоа царини за увоз од десетици други земји, вклучувајќи 46 отсто за Виетнам, 32 отсто за Тајван, 25 отсто за Јужна Кореја, 24 отсто за увоз од Јапонија, 20 отсто за сите земји од Европската унија.
Според планот на претседателот Доналд Трамп, тарифата за кинескиот увоз првично беше поставена на 34 отсто, а со постојната царина од 20 отсто, ја донесе вкупната стапка на 54 отсто.
Откако кинеските власти најавија реципрочни мерки, Белата куќа објави дека САД ќе ја зголемат вкупната царина за кинески увоз за уште 50 проценти – со што вкупниот износ ќе достигне 104 проценти.
Првата фаза од царините на Трамп – основна стапка од 10 проценти на увозот од речиси сите трговски партнери на САД – стапи на сила во саботата рано наутро.
Трамп повтори дека Соединетите Држави биле „откорнати“ од странски царини во минатото, велејќи дека става крај на тоа.
Американскиот претседател најави претстојно воведување високи царини за увоз на фармацевтски производи во Соединетите Американски Држави и изјави дека овој потег ќе го врати производството на лекови во САД, објави порталот Политико.
Тарифите за увоз на лекови во САД не беа вклучени во првата рунда царини што Трамп ги наметна на земјите ширум светот. Производството на лекови во САД драстично се намали во последниве децении, при што најголем дел од производството на фармацевтски состојки се пресели во Кина и други земји, според Управата за храна и лекови на САД.
