Судскиот процес „Онкологија“ продолжува: Вештаците тврдат дека скапи терапии биле применувани без индикација
Судскиот процес за случајот „Онкологија“ продолжи и денеска во Скопски кривичен суд, кој ја привлече вниманието на јавноста поради откриените злоупотреби и несовесно лекување на пациенти на Клиниката за радиотерапија и онкологија.
Во текот на денешното рочиште сведочеа вештаци – доктори од Словенија, ангажирани од Обвинителството, кои претходно изнесоа алармантни сознанија за неправилности во третманот на пациентите. Тие посочија дека кај дел од пациентите биле користени скапи биолошки терапии без јасна медицинска индикација и без соодветна документација во историјата на болеста. Некои од тие лекови дури можеле да делуваат контрапродуктивно.
Вештаците исто така сведочеа дека во повеќе случаи недостасувале конзилијарни одлуки и писмени траги за промените на терапијата, што според нив претставува сериозно отстапување од стандардните онколошки протоколи. Одбраната, пак, тврди дека сè било правено според македонските протоколи.
Обвинението ги товари поранешниот директор на Клиниката, Нино Васев, и докторите Симонида Црвенкова и Драган Јакимовски за „тешки дела против здравјето на луѓето“ и несовесно лекување на околу 29 пациенти во периодот 2018–2022 година.
