Судски совет: Секое надворешно коментирање на судските постапки претставува недозволив упад во работата на судството
Судскиот совет на Република Северна Македонија соопшти дека остро се спротивставува на користењето на судството за дневнополитички цели и порача дека судиите се самостојни и независни во донесувањето на одлуките. Секое надворешно коментирање на судските постапки, како што се нагласува, претставува недозволив упад во работата на судството.
„Судиите, и покрај ограничените човечки и финансиски ресурси, вложуваат максимални напори за обезбедување брза и ефикасна правда. Секој кој располага со сериозни индиции и докази за криминално или коруптивно однесување во судството има обврска веднаш да пријави до Судскиот совет или до другите надлежни институции. Непријавувањето на такви сознанија претставува сериозно кривично дело,“ се наведува во соопштението објавено на веб-страницата на Судскиот совет.
Во документот понатаму се истакнува дека Судскиот совет, како самостоен и независен орган на судската власт, во иднина нема да коментира политички изјави, но секогаш ќе реагира со цел да ја заштити законитоста и независноста на судството.
