Струга ТЛ е нов шампион на Македонија!
Струга ја круниса извонредната сезона во која имаше историски девет од девет на стартот на сезоната, од прво коло е лидер и сега круна на целата сезона која ја почна Срѓан Захариевски, а ја завршува Шпетим Дуро е оваа шампионска титула. Стружани со денешната победа, како и триумфот на Шкупи против Шкендија дојде на недостижните седум бода пред чаирчани и осум пред Шкендија пред последните две кола во следните седум дена кои само формално ќе ги одиграат во две дербија против годинешните директни конкуренти.
Новиот македонски првак денеска можеше до врв да го наполни Силекс, посебно во првиот дел кога промашија еден куп зицери, пред Бесарт Ибраими да даде гол за водство на три минути пред паузата, а потоа Бунјамин Шабани три минути по стартот на вториот дел го дуплираше водството, за во 78-та со својот втор гол да стави печат на победата.
На Чаир, пак, поинаку тргна мечот од кој зависеше оваа титула денеска на Струга. Ералдо Чинари даде гол по 17 минути игра, па Сандеј Адетунџи израмни во 28-та, за Бојан Илиевски во 77-та да даде гол за предност. Но, Шкендија имаше шанса десет минути пред крајот да се врати во мечот и да се бори за победа за барем да ја одложи шампионската промоција на Струга, но Чинари промаши пенал откако Кристијан Наумовски извонредно му одбрани.
