Струга надвор од туристичката мапа – природните убавини тонеат во заборав
Струга, еден од најубавите градови со богата природа и култура, со години останува надвор од туристичкото и државното внимание.
Главниот проблем е недостатокот на одржливи инвестиции: амортизирани патишта, недостапност до меѓународните пазари и отсуство на стратегија за привлекување странски туристи. Ситуацијата дополнително се влошува поради тоа што локалното раководство не го искористува потенцијалот што веќе го има на располагање. Факт е дека досегашните локални власти се ограничија само на ветувања, без да понудат конкретни проекти што би ја извлекле Струга од ќорсокакот во кој е заглавена.
Последиците сериозно се чувствуваат во економијата. Само во текот на 2023 година во Струга се затворија 154 бизниси, а економската состојба и во 2025 останува тешка, со компании што и понатаму се борат за опстанок. Недостигот на работна сила стана алармантен, оставајќи ги хотелите и рестораните без персонал токму во пикот на сезоната. Наместо туризмот да носи развој, градот се соочува со економски пад и масовно иселување на младите.
Доколку локалната власт продолжи со истиот пристап, Струга ризикува да остане не само надвор од туристичката мапа на земјата, туку и надвор од идните развојни планови. Градот што некогаш требаше да биде симбол на туризмот и националната гордост, денес е пример за заборав и институционална негрижа, но и недостаток на визија од досегашните локални раководства.
Во Струга постојат сместувачки капацитети за 8–10 илјади туристи дневно, што значи околу 4.000 соби со 8–10 илјади легла (хотели, мотели, автокампови, соби, апартмани, куќи и други типови на сместување). На целата територија на Струга функционираат 60 ресторани со традиционален и современ карактер, 50 објекти за брза храна и 60 современи кафетерии за сите вкусови, како и 20 туристички агенции за организација на патувања. Сепак, недостатокот на инвестиции го држи во заложништво развојот на туризмот во овој град.
