Страшна несреќа во Фиренца: Двајца работници загинаа по уривање на зграда

Најмалку двајца работници загинаа откако се урна зграда во изградба во Фиренца, Италија.

Градилиштето на супермаркет во Виа Марита, во Фиренца, утрово се урнало, соопштија италијанските пожарникари.

Според првичните информации животот го загубиле двајца работници кои биле ангажирани на градилиштето.

Властите во регионот на Тоскана, каде се наоѓа Фиренца, соопштија дека во моментот на инцидентот на градилиштето имало осум лица, а три лица се спасени, додека потрагата по уште три е во тек.

Противпожарните екипи со кучиња трагачи и спасувачи продолжуваат со потрагата по работниците.

Градоначалникот на Фиренца Дарио Нардела прогласи Ден на жалост во градот. Очевидци го опишаа моментот на колапсот како „многу силен звук како експлозија на бомба“.

Порака со сочувство објави и премиерот Џорџија Мелони и рече дека внимателно го следат развојот на настаните.Во знак на протест поради смртта на работниците, ограноците на одредени синдикати во регионот на Тоскана одлучија да започнат итен штрајк во последните два часа од денешната смена.