СТРАНЦИТЕ СЕ ПОВЛЕКУВААТ? Се повеќе отстапуваат од купување недвижности во Хрватска

Странците први повлекоа рачна кога е во прашање хрватскиот пазар на недвижности. Според податоците на Даночната управа, до средината на декември 2023 година, странците купиле четвртина помалку недвижен имот во Хрватска отколку во 2022 година.

Лани 9.515 странци решиле да инвестираат во недвижности во Хрватска, додека годинава бројот на странски купувачи паднал под 7.400! Тоа се претежно куќи и станови покрај море кои новите сопственици ги користат за сопствен одмор, но често и за кирија и дополнителни приходи.

Странските купувачи на недвижности најчесто доаѓаат од Германија, Словенија, Австрија и од Чешка и Словачка. За многумина, инвестирањето во Хрватска е добра инвестиција бидејќи нуди солидна добивка од разликата во цената доколку решат да препродаваат, но она што го купиле им овозможува и постојан прилив на капитал доколку почнат да изнајмуваат.

Внимателноста на странските купувачи произлезе пред се од економската состојба во нивните матични земји, а дури потоа е и последица на поскапувањето на недвижностите во Хрватска, кое не запира ниту годинава. Од 2015 година до денес, цените на недвижностите во многу делови од земјата се двојно зголемени.

Просечните цени на новите продадени станови во Загреб во првиот дел од годинава надминаа 2.600 евра за метар квадратен, а цените се слични и долж јадранскиот брег, ако не и повисоки, но квадрат во Кварнер, Истра, Далмација или Загреб сè уште е поевтин отколку во многу западноевропски градови.

Пословни.хр

Фото: ЕПА