„Страдаат од анксиозност“, Таравари со дијагноза за доскорешните сопартијци кои одлучија да останат со Владата
Претседателот на Алијансата за Албанците, Арбен Таравари, со нова порака до јавноста по денешната прес-конференција на Арбен Фетаи и неговата група, која брои помалку од 40 луѓе, според официјални партиски извори. Иако не ги спомена по име, Таравари индиректно одговори на иницијативата за фракционирање во редовите на партијата.
„Анксиозноста е најлошото чувство кое човек го доживува… особено кога е измешано со чувство на вина“, напиша Таравари на социјалните мрежи, алудирајќи на емоционалната состојба на оние кои, според него, одлучиле да дејствуваат надвор од волјата на членството.
Лидерот на Алијансата ја искористи оваа прилика и да ја засили мотивацијата меѓу своите поддржувачи, упатувајќи порака за претстојните избори:
„Продолжуваме помирно и посигурно од кога било кон октомвриската победа која е блиску… многу блиску!“
Оваа реакција доаѓа по најавите за евентуално ново политичко делување од страна на поранешни функционери и членови, кои тврдат дека вистинскиот дух на Алијансата е компромитиран. Таравари, пак, сигнализира цврста контрола врз партиските процеси и уверување дека членството останува лојално на официјалниот правец и заложбите во рамки на коалицијата ВЛЕН.
Партијата, како што велат од раководството, веќе ги зајакнува редовите за кампањата што следува, со цел да ја капитализира поддршката која ја доби по парламентарните избори.
