СТЕРЈОВСКИ: Сите овие донации што ги прават Бугарите, ги претставуваат во медиумите дека ги дониравме за Бугарите во Пустец
Бугарија донира за жителите на Пустец во Албанија.
Претседателот на единствената македонска партија во Албанија, Македонска алијанса за европска интеграција, МАЕИ, Васил Стерјовски гостувајќи во телевизија СОТ кажа дека виновна е нашата држава, што не помага, што ги остави во таква состојба, како здравствениот дом, така и општината. Додава дека на Здравствениот дом неопходна му е опрема и кадар.
„Кај нас се добредојдени сите странски донатори од која било земја. Сега последно кај нас Јапонија ќе донира еден багер па Јапонија не бара јапонско малцинство во нашата општина. Саудиска Арабија има донирано. Тие не рекоа дека дониравме за Арапите во Пустец“, вели Стерјовски.
Тој одговори зошто Бугарите донираат.
„Во замена за националноста. Сите овие донации што ги прават Бугарите, ги претставуваат во медиумите дека ги дониравме за Бугарите во Пустец. Ќе ви кажам еден случај. Пред неколку години со Општина Девол го кофинансираа патот од Билишта до Врбник и рекоа дека оваа инвестиција ја правиме за бугарското малцинство во Врбник. Амбасадорот на Бугарија доаѓаше неколку пати, доаѓаа и други дипломати“, вели Стерјовски.
Кажа дека „општината е призната 80 години, како македонска заедница и служи како мост меѓу двете земји”. Претходно, беше соопштено дека Бугарија нуди пасоши на Македонците во Албанија, а за пописот имаше и поплаки дека со телефони и таблети сакаат да ги натераат Македонците да се изјаснат како Бугари. Бугарија освен што зборува за бугарско малцинство во Албанија, сега бара малцинство и на Косово.
