Стечај им се заканува на се поголем број компании во Германија – Што се случува, зошто толку многу компаниите пропаѓаат?

Бројот на несолвентните компании во Германија повторно расте. Само во првите шест месеци од годинава кредитното биро „Кредитреформ“ регистрира 8.400 фирми во стечај.

Бирото соопшти дека станува збор за зголемување од 16,2 отсто во однос на првата половина од минатата година. Поголем процентуален пораст е забележан, според експертите, последен пат во 2002 година, пренесува „Б92.рс“.

„Огромното финансиско оптоварување поради високите цени на енергијата и материјалите го покажува својот ефект. По години на опаѓање на неликвидноста, трендот сега е обратен“, рече Патрик-Лудвиг Ханч, директор за економски истражувања во Kreditreform.

Сепак, иако тоа е значително зголемување, тоа е повеќе нормализација отколку бран на несолвентност, рече експертот.

За таквиот развој придонесе и лошата потрошувачка клима.

„Инфлацијата ги потресе потрошувачите и во голема мера ја спречува нивната волја за трошење“, оцени Ханч. Дополнително, додаде тој, и средствата кои државата великодушно ги распредели за време на пандемијата, а кои сега треба да се вратат, стануваат проблем за многу компании.

Бројот на неликвидност на физички лица, за разлика од фирмите, во првото полугодие со 33.200 е на ниво од минатата година.

„Енергетската криза и поскапувањата сè уште немаат опипливо влијание врз бројот на несолвентности на потрошувачите“, рече Ханч.

Една од причините за тоа, според неговото мислење, е што пазарот на труд и покрај актуелната техничка рецесија, досега се покажал како отпорен. Дополнително, потешката економска ситуација влијае на неликвидноста на потрошувачите само со одредено задоцнување.

Од кредитното биро пресметуваат дека до крајот на оваа година состојбата со фирмите дополнително ќе се влоши.

„Економската клима за компаниите поради инфлацијата, како и каматната политика, остануваат многу тензични“, рече Ханч, наведувајќи дека бројот на банкроти на компании во наредните месеци може да се забрза.