„Станува збор за епска неспособност“, вели Мицкоски за справувањето со дојавите за бомби

Претседателот Стево Пендаровски наместо да го свика Советот за безбедност – молчи, МВР се однесува аматерски, а во Министерството за образование има епска неспособност, оцени претседателот на ВМРО-ДПМНЕ Христијан Мицкоски, во одговор на новинарско прашања за лажните дојави за бомби во училиштата.

Мицкоски, по денешното отворање на спортска сала во населеното место Стајковски во Општина Гази Баба, истакна дека постојат информации дека одредени директори на училишта биле „посоветувани“ да ги игнорираат заканувачките содржини кои им стигнуваат на службените мејл адреси, што според него, укажува на можноста дека е „загрозена безбедноста на учениците“.

– Денеска добив уште една уште пошокантна информација, не знам колку е точна, треба да се провери, дека неколку директори во училишта во Скопје, и во основни и во средни, биле посетувани, повторно поставувам како дилема, биле посетувани од страна на припадници на Министерството за внатрешни работи и биле советувани да ги игнорираат дојавите кои што стигнуваат на службените мејл адреси, односно на електронска пошта, да ги игнорираат како тоа да не се случува, па дури и некој биле советувани и воопшто да не ја отвораат електронската пошта, изјави Мицкоски.

Според него во целиот овој случај со дојавите за бомби, министерот за образование покажал неспособност за спарување со проблемот.

– Станува збор за епска неспособност и епски најнеспособниот министер, што за жал поради определени коалициски гимнастики се уште е министер за образование. За жал повторно ќе кажам, се соочуваме со максимално криминални и неспособни политичари, кои што немаат стратегија и не знаат како да се справат со предизвиците, а жртва се најмилите, а тоа се нашите деца, учениците без разлика дали се тоа во основните или во средните училишта, нагласи Мицкоски.