ССМ утре ќе ја блокира Владата: Трендафилов најавува генерален штрајк
Сојузот на синдикатите на Македонија (ССМ) најави дека утре во 11 часот ќе ја блокира Владата со 21 синдикален претставник. Ова е третата активност од втората фаза синдикални притисоци за зголемување на работничките плати.
Претседателот на ССМ, Слободан Трендафилов, истакна дека бројот од 21 учесник е законски минимум според Законот за јавни собири за блокирање институција или сообраќајница.
„Ќе бидеме 21 човек. Не се откажуваме додека минималната плата не се зголеми на 600 евра и сите други плати за најмалку 6.000 денари“, изјави Трендафилов.
Причина за блокадата
Блокадата следи по неуспехот на Владата и работодавачите да постигнат договор до 31 декември 2025 година за зголемување на минималната плата. Според ССМ, работодавачите биле подготвени да ги зголемат платите за најмалку 6.000 денари, но побарале да бидат ослободени од плаќање придонеси за социјално осигурување, што би значело околу 3.000 денари по работник.
Трендафилов оцени дека одбивањето на ова решение го чини државниот буџет најмалку 10 милиони евра месечно, односно околу 120 милиони евра годишно.
Вредноста на синдикалната минимална кошница
Трендафилов нагласи дека синдикалната минимална кошница се зголемила за 9.250 денари, што значи дека четиричлено семејство станало посиромашно за истиот износ.
Генерален штрајк на повидок
Синдикатот е пред донесување одлука за 24-часовен генерален штрајк во јавниот и приватниот сектор на целата територија на државата.
„Секој работник ќе има право да дојде на работа, но да не ги извршува обврските и да ни се придружи на протестот. Колку повеќе излезат, толку повеќе ќе добијат“, рече Трендафилов.
Одлуката за евентуалниот генерален штрајк ќе биде донесена по утрешната блокада, пред или по седницата на Владата. ССМ очекува Владата да ја искористи можноста и да донесе одлука за зголемување на платите и да ги прифати нивните предлози.
