ССМ повика на блокада пред Собранието
Сојузот на синдикатите на Македонија (ССМ) најави протест и блокада пред Собранието на 10 февруари 2026 година (вторник) со почеток во 9 часот. Одлуката, како што информираат, е донесена на заедничка седница на Претседателството и Советот на ССМ, а протестот ќе се одржи на улиците „11 Октомври“ и „Даме Груев“.
Претседателот на ССМ, Слободан Трендафилов во објава Фејсбук профилот вели дека пратениците со месеци молчат за нивниот предлог за зголемување на минималната плата и на останатите плати во земјава. Синдикатот бара минималната плата веднаш да се зголеми на 600 евра, а останатите плати да се покачат за најмалку 6.000 денари, односно за разликата меѓу сегашната и новата минимална плата.
Според Трендафилов, додека работничките барања се игнорираат, пратениците веќе добиле 79 проценти зголемување на платите, а можно е тие дополнително да пораснат за 12,6 проценти доколку Уставниот суд ја укине владината уредба од минатата година. Дополнително, како што наведуваат, платите би се зголемиле и за 9,2 проценти, колку што изнесува порастот на просечната плата за 2025 година според пресметките на гувернерот на Народната банка, што би значело вкупно зголемување од 21,8 проценти.
„Најмалку 250 евра повеќе за пратениците, а ни 25 евра за работниците е срамно“, порачуваат од ССМ, обвинувајќи дека функционерите уживаат привилегии како субвенционирано собраниско бифе и патни трошоци, права кои, според нив, им се ускратени на работниците во однос на трошоците за храна и превоз.
Од Синдикатот најавуваат дека преку блокадата ќе ги спречат пратениците да наплатат патни трошоци за тој ден и симболично ќе побараат тие да дојдат на работа пеш или со јавен превоз, како што тоа го прават работниците.
ССМ ги повикува пратениците итно да гласаат за зголемување на минималната и на останатите плати, но и за намалување на функционерските примања, согласно нивната иницијатива. Во спротивно, најавуваат собирање на 10.000 потписи за покренување иницијатива за намалување на платите на функционерите и зголемување на работничките плати.
„Ќе мора да изберат – дали ќе гласаат за себе, а против работниците, или ќе гласаат за работниците“, порача Трендафилов.
За време на протестот ќе биде овозможено непречено движење на Итната медицинска помош, Противпожарната бригада и полицијата. Од ССМ се извинуваат до граѓаните за евентуалните отежнувања во сообраќајот и најавуваат дека сите итни случаи ќе бидат пропуштани.
