Српскиот олигарх Мишковиќ добил оштета од 30-тина милиони евра поради неосновано апсење
Најбогатиот српски бизнисмен Мирослав Мишковиќ добил пресуда за оштета од 32,7 милиони евра која треба да му ја исплати Србија поради пристрасно апсење и судење пред 12 години.
Пресудата на меѓународната арбитража која ја казни Србија во спорот со сопственикот на Делта Холдинг открива дека за ваквиот исход придонел и српскиот претседател Александар Вучиќ,кој влијаел на ваквиот исход поради стекнување на лична популарност.
Оваа пресуда, до која „Радар“ имал пристап, открива дека Вучиќ влијаел на судовите,што на крајот ја чинело државата повеќе од 32,7 милиони евра.
„Трибуналот заклучува дека постојат докази кои укажуваат на постоење на несоодветно влијание извршено од државата врз судството“. Содржината на оваа пресуда, донесена на 10 март 2021 година, досега беше тајна за јавноста.
Патем, меѓународната арбитража беше иницирана од кипарската компанија Мера Инвестмент Фонд Лимитед против државата Србија на 28 септември 2016 година. Ова е само една на фирмите чии имоти биле блокирани во постапката против Мирослав Мишковиќ и неговиот син Марко. Тогаш беа блокирани и акциите на Хемслејд трејд лимитед, друга кипарска компанија во сопственост на Мирослав Мишковиќ и која имаше контролен удел во српската Делта и многу други компании на овој бизнисмен.
Во заклучокот на пресудата се прецизирани сумите на пари кои државата Србија е должна да ги плати. Кога се ќе се собере, таа изнесува над 32,7 милиони евра. Точка по точка се објаснува дека „арбитражниот трибунал констатира дека вкупната штета што ја претрпел тужителот изнесува 25.184.846 евра“. Потоа, за тој износ се определува камата „од 5.581.128,09 евра, пресметана од датумот на поднесување на барањата за поведување на арбитражната одлука, поточно 28 септември 2016 година, до денот на донесувањето на оваа одлука, 10 март 2021 година“. Со пресудата е наложено и рок од 180 дена или до 7 септември 2021 година за овие плаќања.
