Српската премиерка нема да оди во Грција поради нивниот став за Косово во Советот на Европа
Српската премиерка Ана Брнабиќ одби да учествува на Економскиот форум во Делфи поради неутралната позиција на Грција во Советот на Европа при гласањето за членството на Косово во организацијата.
За позицијата на Грција реагираше професорот Јоргос Катругалос, поранешен шеф на дипломатијата во последната влада на Алексис Ципрас.
„Нашата земја мора секогаш да промовира мир и стабилност на Балканот, поддржувајќи заемно прифатливи чекори и решенија. Одлуката на Владата да се разликува од другите земји на ЕУ кои не го признаваат Косово, како што се Шпанија, Романија, не придонесува за оваа цел и особено Кипар, кој гласаше против. Оваа позиција не беше разговарана со политичките сили, иако ја менува, без објаснување, цврстата грчка позиција. Истовремено, ја ослабува посредничката улога што Грција треба да ја има во регионот“, напиша тој на Твитер.
Министерскиот комитет на Советот на Европа, кој ги претставува 46-те земји членки, на вонреден состанок во понеделник, со повеќе од две третини од гласовите, донесе одлука да го разгледа барањето за членство на Република Косово.
Од претставниците на 33 земји, седум беа против (Србија, Азербејџан, Грузија, Романија, Кипар, Шпанија и Унгарија), а петмина беа воздржани (Грција, Словачка, Молдавија, Украина и БиХ). Ерменија не гласаше.
