Средба Остин – Петровска во Пентагон – потпишан 10 годишен патоказ за соработка во одбраната
Дополнително зацврстување на одбранбените односи меѓу двете земји. Ова е договорено на средбата помеѓу министерката за одбрана Славјанка Петровска и секретарот за одбрана Лојд Остин. Во Пентагон Петровска беше дочекана со највисоки воени почести. Двајцата потпишаа и 10 годишен патоказ за соработка во одбраната, кој ги поставува целите на двете земји да работат заедно на решавање на заедничките одбранбени предизвици. Министерката Славјанка Петровска во Вашингтон зборуваше за ТВ21 и средбата 28-миот секретар за одбрана на Соединетите држави и првиот Афроамериканец кој служел на оваа функција.
„Патоказот е документ со кој ги даваме насоките за тоа како во периодот од оваа година па во наредните 10 години ќе го трасираме развојот и соработката во делот на одбраната. И како она што досега навистина успешно го правиме да го надоградиме и да створиме уште поголеми заеднички резултати“, вели Славјанка Петровска.
На средбата се разговарало и за Војната во Украина како и за интересите и вредностите на Европа, за која Остин вели дека е слободна, цела и во мир. Тој искажува пофалби за Македонија поради придонесот во НАТО Алијансата акцентирајќи ги „силните билатерални одбранбени односи на САД и Македонија“. Министерката Петровска уште една ја потенцираше гордоста што Македонија го поддржа украинскиот народ во време кога помошта е најпотребна.
„Располагавме и располагаме со опрема која согласно нашите стандарди и согласно НАТО стандардите не ни е потребна, односно е предмет на замена или набавка на нова. Процесот на модернизација кој што започна во 2017 година и уште повеќе се интензивираше ни овозможува да бидеме донатори, и да даваме опрема која на нам не ни е потребна, а се разбира на нашите украински пријатели и те како им е потреба и сами тие ја бараат. Кога дововолно инвестирате во одбраната и тоа го правите плански и навремено, може да донесете одлуки за донирање и тука нема да има повторно ќе го нагласам потреба од стравување дека ја намалуваме борбената готовност на македонската армија, напротив со модернизацијата и со процесите кои се во тек само ја зајакнуваме или ја држиме на соодветното ниво“, додава Славјанка Петровска.
Администрацијата на Бајден продолжува да ја поддржува Украина, а до сега обезбедени се речиси 40 милијарди долари безбедноста помош. Македонија и САД продолжуваат да ги јакнат заедничките одбранбени приоритети, а токму тоа ќе биде тема и на самиот на НАТО во Вилнус, Литванија.
