Средба на директорите на македонската и грчката царина: Ќе работиме на нови иницијативи кои значително ќе ја забрзаат трговијата
Македонската и грчката царинска управа ќе работат на унапредување на трговските и безбедносните политики во прекуграничната трговија. Воспоставување зелени коридори и двонасочна електронска размена за секој увоз и извоз на трите гранични премини, воспоставување на концепт за едно застанување на Богородица – Евзони, како и размена на разузнавачки податоци и креирање профили на ризик за цели на истрагите се само дел од иницијативите на коишто двете страни ќе работат во следниот период. Ова е договорено на денешната билатерална средба помеѓу директорите на царинските управи, Бобан Николовски и Константинос Муртидис и експертски тимови од највисокото раководство одржана во Солун.
„Како соседни земји, клучно е зајакнување на врските и унапредување на соработката помеѓу двете управи, преку споделување на најдобри практики, размена на информации во реално време, но и спроведување заеднички иницијативи за олеснување на трговијата” истакна директорот Бобан Николовски.
Двете страни информираа дека новиот компјутеризиран транзитен систем фаза 5 на чија имплементација работат ќе биде пуштен во јануари.
Како особено важно, беше истакнато зајакнувањето на институционалните капацитети преку одржување на заеднички обуки, споделување најдобри практики и одржување редовни средби на експертско ниво. Во оваа насока, во следниот период договорено е грчката царина да ги сподели искуствата во делот на следење и контрола на тутунски производи преку системот „Track and trays“.
Од македонска страна беше информирано за националниот едношалтерски систем на чија имплементација царинската управа интензивно работи, како и за новиот систем за видео надзор и препознавање на регистарските таблички што од пред еден месец е целосно ставен во функција на сите гранични премини и гранични терминали. Исто така двете страни информираа за активностите што се преземаат за отворање на новиот граничен премин Маркова Нога.
Директорот на грчка царина, Константинос Муртидис, ги истакна заедничките цели на управите за олеснување на трговијата.
Настанот во Солун беше одржан во просториите на комората за трговија и индустрија, при што кратко воведно обраќање имаше и од претседателот на Комората, Константинос Мураитидис, којшто ја нагласи улогата на приватниот сектор во поддршка на процесите за олеснување на прекуграничната трговија помеѓу двете држави.
