Средба на Андоновски и претставници на Синдикатот на УПОЗ: Целосна инклузивност и транспарентност во процесот на креирање на политики
Заменик министерот во Министерство за информатичко општество и администрација, Стефан Андоновски на средбата со претставниците на Синдикатот на УПОЗ вети целосна транспарентност и инклузивност во процесот на креирање и спроведување на политиките кои се однесуваат на јавната администрација, правата и обврските на административните службеници како и вработените во јавниот сектор.
На средбата и двете страни се согласија дека ситуацијата со одливот на квалитетни, искусни и докажани кадри е алармантна и дека е неопходно итно да се развие и примени соодветен систем кој ќе обезбеди нивно задржување.
„Законско решение за додатоци на плата кое го предлага Владата остава премногу простор за субјективност и дава дискреционо право на функционерот да одлучи дали некој ќе добие додаток на плата, наместо да имаме дефинирани јасни и мерливи критериуми и индикатори.“
Двете страни се согласија дека заеднички ќе работат на анализа и примена на веќе докажани и успешни решенија од регионот и Европа. Македонија мора повторно да биде лидер во реформите во поширокиот регион, наместо сегашната состојба кога вработените во јавната администрација се на дното споредено со нивните колеги од Балканот.
