„Срамота е што оваа држава дозволи да се случи со Партизан, ни звездашите не се среќни од ова“
Партизан се наоѓа во плејаут зоната, претходно испадна од сите три европски купови и за два месеца од стартот на сезоната доживеа еден куп катастрофи. Јовановиќ е еден од ретките во клубот кои проговорија на овие теми, но призна дека не гледа решение во моментов.
„Искрено, Звезда е двојно поквалитетна од нас, денеска играше со некои 50-60%, а не победи со 4-0. Во овој момент Партизан не е конкурент, мене како капитен тоа тешко ми паѓа. Не можам да верувам што дозволи оваа држава да се случи со Партизан, тоа е срамота. Да играме дерби кое не е дерби. Ова е на многу повисоко ниво, тоа го знаете и вие (новинарите н.з.), но не смеете да напишете. Јас немам проблем со никого, ве гледам во очи и ви кажувам каква е ситуацијата, можам утре да си одам од клубот и имам каде да продолжам. Верувам дека ниеден звездаш не е среќен кога го гледа ова, тоа е факт, ни на претседателот, премиерот и кој и да е. Ова никому не одговара, всушност можеби и некому одговара, но тоа не е поентата“, рече Јовановиќ.
Во последните четири кола Партизан освои само два бода и со натпревар помалку сега е на деветтото место на табелата. Последната победа во првенството „црно-белите“ ја остварија на 4 август, против Железничар Панчево на домашен терен.
