Спектакуларно финале во Битола: МЗТ без Војдан и Дамјан во финишот до 12. трофеј во Купот (ФОТО)
Натпреварот не беше квалитетен, но беше крајно возбудлив со финиш кој беше опасен за тие со слабо срце. Јунак во таборот на сино-белите беше Американецот Ејасу Ворку, кој го постигна победничкиот кош на нешто помалку од три секунди и тоа откако претходно двапати промаши од речиси идентични зицер-позиции. Зелено-белите потоа имаа обид за триумф, Александар Костовски дојде до позиција да шутне за тројка, но за жал на четири илјадната публика топката го погоди само обрачот. Победата на гостите е уште поголема ако се знае дека во последниот период играа без повредениот Војдан Стојановски, а во последните четири минути и без Дамјан Стојановски поради пет лични грешки.
Двете екипи тврдо и некако преимпресионирано го почнаа натпреварот, поради што првата четвртина изобилуваше со грешки, промашени шутеви и загубени топки на обете страни. Тоа особено се однесуваше на пелистерци, кои во стартните десет минтуи ги промашија сите шест удари за тројка и „продадоа“ пет напади, но аеродромци не го искористија премногу овој хаос, бидејќи периодот го завршија со само плус четири (13-9).
Вториот период донесе нешто подобра кошарка, за што се погрижија домашните кошаркари на кои, конечно, им проработе шутот од далечина. Тоа најмногу се однесува на ударите за тројка, со оглед што погодија шест вакви проектили со само две промашувања. Ваквите „бомби“ на составот од Битола му донесе серија 9-2 со која дојдое до првата поопиплива предност на оваа средба (33-27), која дозволи до полувремето да биде намалена само за еден поен (36-31).
Второто полувреме почна со седум поени во низа на гостите од Скопје, кои со тоа го презедоа водството, но само за кратко. Следува посилен одговор од зелено-белите, кои со серија 10-0 дојдоа до највисокото до тогаш водство со плус осум (38-46), кое нивниот противник дури пред самиот крај го спушти на минус три (49-52), како најава за возбудлива разрешница во последните десет минути.
Дамјан Робев беше икс-факторот кај МЗТ со оглед што блесна кога беше најпотребно, кога на теренот ги немаше браќата Стојановски, па со 13 поени беше најпрецизен во својот тим. Зад него беа Душан Танасковиќ со 12 и херојот Ворку со 11 поени. Костовски со 15 поени беше најпрецизен кај Пелистер.
Ова беше 12. трофеј за составот од Аеродром во Купот на Македонија, со што сега имаат два пехари повеќе во однос на Работнички. Пелистер и во второто финале остана само на дофат до посакуваната цел.
