Советот го отстрани Панчевски од трката за државен јавен обвинител
Постапката за избор на нов државен јавен обвинител продолжува без Владимир Панчевски, откако Советот на јавни обвинители одлучи да го дисквалификува од трката поради неисполнување на законските услови.
Од Советот појаснија дека според Законот за јавно обвинителство, кандидатот мора да има најмалку 10 години непрекинат работен стаж од областа на кривичното право. Во конкретниот случај, на Панчевски функцијата му престанала пред 13 години, а во меѓувреме не извршувал ниту судиска ниту обвинителска функција.
Поради тоа, како што наведуваат, неговиот претходен стаж не може да се смета за непрекинат во смисла на законот, што значи дека не ги исполнува условите да се најде на листата на кандидати за кои ќе се гласа.
Владимир Панчевски во минатото беше осуден за злоупотреба на службената положба и овластувања поврзани со злоупотреби на АКМИС-системот, електронскиот систем за автоматска распределба на предмети кај судиите.
